ದುಬೈ: ಮಹಿಳಾ ಏಷ್ಯಾಕಪ್‌ 2026ರ ಭಾರತ-ಪಾಕಿಸ್ತಾನ ಪಂದ್ಯ ಸಂಪೂರ್ಣ ಏಕಪಕ್ಷೀಯವಾಗಿ ಅಂತ್ಯಗೊಂಡಿದೆ. ಭಾರತದ ಸ್ಪಿನ್ ದಾಳಿಗೆ ತತ್ತರಿಸಿದ ಪಾಕಿಸ್ತಾನ ಮಹಿಳಾ ತಂಡ ಕೇವಲ 55 ರನ್‌ಗಳಿಗೆ ಆಲೌಟ್ ಆಯಿತು. ಈ ಸುಲಭ ಗುರಿಯನ್ನು ಭಾರತ ಕೇವಲ 8.4 ಓವರ್‌ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಬೆನ್ನಟ್ಟಿ 7 ವಿಕೆಟ್‌ಗಳ ಭರ್ಜರಿ ಗೆಲುವು ದಾಖಲಿಸಿತು.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನಕ್ಕೆ ಮುನೀಬಾ ಅಲಿ ಹಾಗೂ ಶಾವಾಲ್ ಜುಲ್ಫಿಕರ್ 27 ರನ್‌ಗಳ ಆರಂಭ ನೀಡಿದರು. ಆದರೆ ನಂತರ ಭಾರತೀಯ ಸ್ಪಿನ್ನರ್‌ಗಳಾದ ಶ್ರೀ ಚರಣಿ, ದೀಪ್ತಿ ಶರ್ಮಾ, ಪ್ರೇಮಾ ರಾವತ್ ಹಾಗೂ ಶಫಾಲಿ ವರ್ಮಾ ದಾಳಿಗೆ ಪಾಕ್ ಬ್ಯಾಟಿಂಗ್ ಕುಸಿಯಿತು. 27 ರನ್‌ಗಳ ಬಳಿಕ ಕೇವಲ 28 ರನ್‌ಗಳಿಸುವಷ್ಟರಲ್ಲಿ ಉಳಿದ 9 ವಿಕೆಟ್‌ಗಳನ್ನು ಕಳೆದುಕೊಂಡಿತು.
ಈ ಗೆಲುವಿನೊಂದಿಗೆ ಭಾರತ ಲೀಗ್ ಹಂತದಲ್ಲಿ ಸತತ ಮೂರನೇ ಗೆಲುವು ದಾಖಲಿಸಿ ಅಜೇಯವಾಗಿ ಸೆಮಿಫೈನಲ್‌ಗೆ ಪ್ರವೇಶಿಸಿದೆ.
ಪಾಕ್‌ಗೆ ಹೀನಾಯ ದಾಖಲೆಗಳ ಸರಮಾಲೆ
55 ರನ್‌ಗಳಿಗೆ ಆಲೌಟ್ ಆಗಿರುವುದು ಪಾಕಿಸ್ತಾನದ ಟಿ20 ಅಂತಾರಾಷ್ಟ್ರೀಯ ಇತಿಹಾಸದ ಕನಿಷ್ಠ ಮೊತ್ತವಾಗಿದೆ. ಈ ಹಿಂದೆ 2024ರಲ್ಲಿ ನ್ಯೂಜಿಲೆಂಡ್ ವಿರುದ್ಧ 56 ರನ್‌ಗಳಿಗೆ ಆಲೌಟ್ ಆಗಿದ್ದೇ ಕನಿಷ್ಠವಾಗಿತ್ತು. ಭಾರತ ವಿರುದ್ಧವೂ ಇದು ಪಾಕ್‌ನ ಅತ್ಯಂತ ಕಡಿಮೆ ಸ್ಕೋರ್.
ಪಾಕ್ ತಂಡದ 9 ಬ್ಯಾಟರ್‌ಗಳು ಒಂದಂಕಿ ರನ್‌ಗೆ ಸೀಮಿತವಾದರೆ, ಮೂವರು ಶೂನ್ಯಕ್ಕೆ ಔಟಾದರು. ಒಂದು ಹಂತದಲ್ಲಿ 27 ರನ್‌ಗಳಿಗೆ ವಿಕೆಟ್ ನಷ್ಟವಿಲ್ಲದೆ ಇದ್ದ ಪಾಕಿಸ್ತಾನ, ಕೇವಲ 8 ರನ್‌ಗಳ ಅಂತರದಲ್ಲಿ 6 ವಿಕೆಟ್‌ಗಳನ್ನು ಕಳೆದುಕೊಂಡಿತು.
ಗುರಿ ಬೆನ್ನಟ್ಟಿದ ಭಾರತಕ್ಕೆ ಶಫಾಲಿ ವರ್ಮಾ ಮೊದಲ ಎಸೆತದಲ್ಲೇ ಸಿಕ್ಸರ್ ಬಾರಿಸಿದರು. ಫಾತಿಮಾ ಸನಾ ಶಫಾಲಿ, ಪ್ರತಿಕಾ ರಾವಲ್ ಹಾಗೂ ಸ್ಮೃತಿ ಮಂಧಾನ ವಿಕೆಟ್ ಪಡೆದರೂ, ಹರ್ಮನ್‌ಪ್ರೀತ್ ಕೌರ್ (18) ಮತ್ತು ದೀಪ್ತಿ ಶರ್ಮಾ (12) ತಂಡವನ್ನು ಗೆಲುವಿನತ್ತ ಕೊಂಡೊಯ್ದರು.
ಪಾಕಿಸ್ತಾನವು 68 ಎಸೆತಗಳು ಬಾಕಿ ಇರುವಾಗಲೇ ಸೋಲೊಪ್ಪಿಕೊಂಡಿತು.
