ನವದೆಹಲಿ: ಮತಗಳ್ಳತನದ ವಿರುದ್ಧ ನವೆಂಬರ್ 1ರಂದು ಇಂಡಿಯಾ ಒಕ್ಕೂಟದ ವತಿಯಿಂದ ಐತಿಹಾಸಿಕ ರ‍್ಯಾಲಿ ಆಯೋಜಿಸಲಾಗುವುದು ಎಂದು ಕಾಂಗ್ರೆಸ್ ನಾಯಕ ದೀಪೇಂದರ್ ಹೂಡಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ದೆಹಲಿಯ ಇಂದಿರಾ ಭವನದಲ್ಲಿ ಹರಿಯಾಣ ಕಾಂಗ್ರೆಸ್ ನಾಯಕರ ಸಭೆ ನಡೆಸಿ, ರ‍್ಯಾಲಿಯ ಸಿದ್ಧತೆಗಳನ್ನು ಪರಿಶೀಲಿಸಲಾಗಿದೆ ಎಂದು ಅವರು ತಿಳಿಸಿದರು. ಹರಿಯಾಣದಲ್ಲಿ ಒಂದೇ ಕ್ಷೇತ್ರವಲ್ಲ, ಇಡೀ ಸರ್ಕಾರವನ್ನೇ ಮತಗಳ್ಳತನದ ಮೂಲಕ ಕಸಿದುಕೊಳ್ಳಲಾಗಿದೆ ಎಂದು ಆರೋಪಿಸಿದ ಹೂಡಾ, ಕೇವಲ ಶೇ. 0.5ರಷ್ಟು ಮತಗಳ ಅಂತರದಲ್ಲಿ ಬಿಜೆಪಿ ಸರ್ಕಾರ ರಚಿಸಿದೆ ಎಂದು ಹೇಳಿದರು. ಚುನಾವಣಾ ಆಯೋಗದ ದುರ್ಬಳಕೆ ಸೇರಿದಂತೆ ಹಲವು ತಂತ್ರಗಳನ್ನು ಬಿಜೆಪಿ ಬಳಸಿದೆ ಎಂಬುದು ಅವರ ಆರೋಪವಾಗಿದೆ. ಮತಗಳ್ಳತನದ ವಿರುದ್ಧ ನಡೆಯುವ ರ‍್ಯಾಲಿಯಲ್ಲಿ ಭಾರಿ ಸಂಖ್ಯೆಯಲ್ಲಿ ಜನರು ಭಾಗವಹಿಸಲಿದ್ದಾರೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ಇದೇ ವೇಳೆ, ಹರಿಯಾಣದಲ್ಲಿನ ವಿದ್ಯುತ್ ಬಿಕ್ಕಟ್ಟಿನ ವಿಚಾರವಾಗಿ ಬಿಜೆಪಿ ಸರ್ಕಾರದ ವಿರುದ್ಧ ಹೂಡಾ ವಾಗ್ದಾಳಿ ನಡೆಸಿದರು. “ಮುಖ್ಯಮಂತ್ರಿ ನಯಾಬ್, ಆದರೆ ಹರಿಯಾಣದಲ್ಲಿ ವಿದ್ಯುತ್ ಗಾಯಬ್” ಎಂದು ವ್ಯಂಗ್ಯವಾಡಿದರು.
ಗುರುಗ್ರಾಮ್ ಮತ್ತು ನುಹ್ ಜಿಲ್ಲೆಗಳಲ್ಲಿ ವಿದ್ಯುತ್ ವಿತರಣೆಯನ್ನು ಖಾಸಗೀಕರಣಗೊಳಿಸುವ ಸರ್ಕಾರದ ನಿರ್ಧಾರಕ್ಕೂ ಅವರು ವಿರೋಧ ವ್ಯಕ್ತಪಡಿಸಿದರು. ಹೆಚ್ಚಿನ ಆದಾಯ ತರುವ ಎರಡು ಜಿಲ್ಲೆಗಳ ವಿದ್ಯುತ್ ವಿತರಣೆಯನ್ನು ಖಾಸಗಿ ಸಂಸ್ಥೆಗಳಿಗೆ ಒಪ್ಪಿಸುವುದು ಪಕ್ಷಪಾತದ ಕ್ರಮ ಎಂದು ಆರೋಪಿಸಿದರು. ಖಾಸಗೀಕರಣದಿಂದ ಅಡ್ಡ-ಸಬ್ಸಿಡಿ ವ್ಯವಸ್ಥೆಗೆ ಧಕ್ಕೆಯಾಗುವ ಆತಂಕವಿದೆ ಎಂದರು.
ಮಧ್ಯಮ ವರ್ಗದವರು, ರೈತರು, ಬಡವರು ಮತ್ತು ಗ್ರಾಮೀಣ ಕುಟುಂಬಗಳಿಗೆ ಕೈಗೆಟುಕುವ ದರದಲ್ಲಿ ವಿದ್ಯುತ್ ದೊರೆಯಬೇಕು. ವಿದ್ಯುತ್ ವಿತರಣೆಯ ಖಾಸಗೀಕರಣದ ಬದಲು ಜನಸಾಮಾನ್ಯರ ಹಿತಾಸಕ್ತಿಗೆ ಆದ್ಯತೆ ನೀಡಬೇಕು ಎಂದು ಹೂಡಾ ಒತ್ತಾಯಿಸಿದರು.
