ನಗೋಯಾ: ಏಷ್ಯನ್ ಗೇಮ್ಸ್ 2026ರಲ್ಲಿ ಭಾರತದ ಸಾಫ್ಟ್ ಟೆನಿಸ್ ಆಟಗಾರ ಜಯ್ ಮೀನಾ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಪುರುಷರ ವೈಯಕ್ತಿಕ ಸಾಫ್ಟ್ ಟೆನಿಸ್ ವಿಭಾಗದಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ ಈ ಕ್ರೀಡೆಯಲ್ಲಿ ಏಷ್ಯನ್ ಗೇಮ್ಸ್ ಪದಕ ಗೆದ್ದ ಭಾರತದ ಮೊದಲ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಬುಧವಾರ ನಡೆದ ಕ್ವಾರ್ಟರ್ಫೈನಲ್ ಪಂದ್ಯದಲ್ಲಿ ಫಿಲಿಪೈನ್ಸ್ನ ಶೆರ್ವಿನ್ ನುಗುಯಿಟ್ ಅವರನ್ನು 4–3 ಅಂತರದಿಂದ ಮಣಿಸಿದ ಮೀನಾ ಸೆಮಿಫೈನಲ್ಗೆ ಪ್ರವೇಶಿಸುವ ಮೂಲಕ ಪದಕ ಖಚಿತಪಡಿಸಿಕೊಂಡರು.
ಈ ಸಾಧನೆ ಏಷ್ಯನ್ ಗೇಮ್ಸ್ನಲ್ಲಿ ಭಾರತೀಯ ಸಾಫ್ಟ್ ಟೆನಿಸ್ಗೆ ಹೊಸ ಅಧ್ಯಾಯ ತೆರೆದಿದೆ. ಮೀನಾ ಅವರಿಗೆ ಇದು ಮೂರನೇ ಏಷ್ಯನ್ ಗೇಮ್ಸ್ ಸ್ಪರ್ಧೆಯಾಗಿದ್ದು, ಈ ಬಾರಿ ಐತಿಹಾಸಿಕ ಪದಕದ ಮೂಲಕ ಗಮನ ಸೆಳೆದಿದ್ದಾರೆ.
ಸ್ಪರ್ಧೆಯ ಆರಂಭದಲ್ಲಿ ಗ್ರೂಪ್ ‘ಡಿ’ಯಲ್ಲಿದ್ದ ಮೀನಾ, ಪಾಕಿಸ್ತಾನದ ಅರೈನ್ ಹುಸೇನ್ ವಿರುದ್ಧ 4–0 ಅಂತರದ ಗೆಲುವು ದಾಖಲಿಸಿ ತಮ್ಮ ಅಭಿಯಾನ ಆರಂಭಿಸಿದ್ದರು.
ಸಾಫ್ಟ್ ಟೆನಿಸ್ನಲ್ಲಿ ಭಾರತಕ್ಕೆ ಇದು ಮೊದಲ ಏಷ್ಯನ್ ಗೇಮ್ಸ್ ಪದಕವಾಗಿದ್ದು, ದೇಶದಲ್ಲಿ ಈ ಕ್ರೀಡೆಯ ಬೆಳವಣಿಗೆಗೆ ಮತ್ತಷ್ಟು ಉತ್ತೇಜನ ದೊರೆಯುವ ನಿರೀಕ್ಷೆ ಮೂಡಿಸಿದೆ.
ಜಯ್ ಮೀನಾ ಸಾಧನೆಗೆ ಮೋದಿ ಅಭಿನಂದನೆ
ಐತಿಹಾಸಿಕ ಕಂಚಿನ ಪದಕ ಗೆದ್ದ ಜಯ್ ಮೀನಾ ಅವರನ್ನು ಪ್ರಧಾನಿ ನರೇಂದ್ರ ಮೋದಿ ಅಭಿನಂದಿಸಿದ್ದಾರೆ.
‘ಎಕ್ಸ್’ನಲ್ಲಿ ಪ್ರಧಾನಿ ಕಚೇರಿ ಹಂಚಿಕೊಂಡ ಸಂದೇಶದಲ್ಲಿ, ಮೀನಾ ಅವರ ಸಾಧನೆ ಭಾರತೀಯ ಸಾಫ್ಟ್ ಟೆನಿಸ್ನಲ್ಲಿ ಹೊಸ ಸ್ಮರಣೀಯ ಅಧ್ಯಾಯ ತೆರೆದಿದೆ ಎಂದು ತಿಳಿಸಿದೆ. ಅವರ ಯಶಸ್ಸು ದೇಶದ ಹೆಚ್ಚಿನ ಯುವಕರನ್ನು ಸಾಫ್ಟ್ ಟೆನಿಸ್ನತ್ತ ಆಕರ್ಷಿಸಲಿದೆ ಎಂಬ ಆಶಯವನ್ನೂ ವ್ಯಕ್ತಪಡಿಸಲಾಗಿದೆ.
ಜಯ್ ಮೀನಾ ಅವರ ಮುಂದಿನ ಕ್ರೀಡಾ ಜೀವನಕ್ಕೆ ಪ್ರಧಾನಿ ಮೋದಿ ಶುಭ ಹಾರೈಸಿದ್ದಾರೆ.
