ವಾಷಿಂಗ್ಟನ್: ಕೃತಕ ಬುದ್ಧಿಮತ್ತೆ (ಎಐ) ನೆರವಿನ ಸಾಧನ ಬಳಸಿ ವಿಶ್ವದಾದ್ಯಂತ ಸಂಸ್ಥೆಗಳ ಮೇಲೆ ಸೈಬರ್ ದಾಳಿಗಳು ನಡೆಯುತ್ತಿವೆ ಎಂದು ಅಮೆರಿಕದ ಎಫ್‌ಬಿಐ ಎಚ್ಚರಿಸಿದೆ.
ARTEX ಎಂಬ ಓಪನ್‌ಸೋರ್ಸ್ ಸಾಧನದ ಮೂಲಕ ಹಣಕಾಸು, ಸರ್ಕಾರಿ, ತಂತ್ರಜ್ಞಾನ, ರಕ್ಷಣಾ, ಇಂಧನ ಮತ್ತು ಆರೋಗ್ಯ ಕ್ಷೇತ್ರಗಳನ್ನು ಗುರಿಯಾಗಿಸಲಾಗುತ್ತಿದೆ. ಗುರಿ ಗುರುತಿಸುವಿಕೆಯಿಂದ ಮಾಹಿತಿ ಕಳವುವರೆಗೆ ಹಲವು ಹಂತಗಳನ್ನು ಈ ಸಾಧನ ಸ್ವಯಂಚಾಲಿತಗೊಳಿಸಬಲ್ಲದು. ಕೆಲವು ದಾಳಿಗಳಲ್ಲಿ ಮೂರು ಗಂಟೆಯೊಳಗೆ ಹ್ಯಾಕರ್‌ಗಳು ಉನ್ನತ ಮಟ್ಟದ ಪ್ರವೇಶ ಪಡೆದಿದ್ದಾರೆ ಎಂದು ಎಫ್‌ಬಿಐ ತಿಳಿಸಿದೆ.
ದಕ್ಷಿಣ ಕೊರಿಯಾದ ಹಣಕಾಸು ಸಂಸ್ಥೆಗಳ ಮೇಲಿನ ದಾಳಿಯಲ್ಲಿ 67,000 ಜನರ ಮಾಹಿತಿ ಕಳವಾಗಿದ್ದು, ಮತ್ತೊಂದು ಪೂರೈಕೆ ಸರಪಳಿ ದಾಳಿಯಿಂದ 2,250ಕ್ಕೂ ಹೆಚ್ಚು ಗ್ರಾಹಕ ಪರಿಸರಗಳಿಗೆ ಪ್ರವೇಶ ಸಾಧ್ಯವಾಗಿದೆ. ಇಂಟರ್‌ನೆಟ್ ಸಂಪರ್ಕಿತ ವ್ಯವಸ್ಥೆಗಳ ಸುರಕ್ಷತೆ ಪರಿಶೀಲಿಸಿ, ಪ್ರವೇಶ ನಿಯಂತ್ರಣ ಬಲಪಡಿಸುವಂತೆ ಎಫ್‌ಬಿಐ ಸೂಚಿಸಿದೆ.
